Fylkir samþykkir tilboð frá Kaiserslautern í Ragnar Braga
skrifað 27-06-2011 (1 athugasemdir)
Fylkir hefur samþykkt tilboð frá Kaiserslautern í Ragnar Braga Sveinsson en þetta staðfesti Ólafur Garðarsson umboðsmaður leikmannsins í samtali við Fótbolta.net í dag.
Ragnar Bragi, sem er 16 ára, fór til Kaiserslautern á reynslu á dögunum og þar heillaði hann forráðamenn félagsins. Hann mun fara til Þýskalands í næstu viku þar sem stefnt er á að ganga frá samningum.
,,Ég er gríðarlega spenntur. Þetta er frábært tækifæri," sagði Ragnar við Fótbolta.net í dag en honum líst vel á þýska félagið.
,,Liðið endaði í sjöunda sæti í Bundesligunni á síðasta tímabili. Æfingaaðstaðan þarna er frábær og það er allt til alls hjá þessu félagi."
,,Ég byrja í U19 ára liðinu þeirra og ef maður stendur sig vel þá hækkar maður sig um tign."
Ragnar Bragi lék sinn fyrsta leik með Fylki í Pepsi-deildinni í fyrra og varð um leið yngsti leikmaður félagsins frá upphafi.
Þessi ungi miðjumaður er í U17 ára landsliði Íslands en forráðamenn Kaiserslautern sáu hann spila þar síðastliðið haust og hrifust af frammistöðu hans.
Tekið af fótbolta.net
eftir TobbZ 12:05 28-06-2011
Já Bundesligan er málið, vonandi að hann geri það gott þar. Einnig að Fylkir sé með góða prósentu á næstu sölu á honum.